هدية العيد ،، بقلم الشاعر احمد الرسام الصغير ،،تحرير امنه غناظ

========= (((((   هدية  العيد  ))))) =========

لكل أمهات شهداء سورية الصابرات المؤمنات الراضيات.

يابني..
يابني.. طولت بغيبتك عليي
وطال غيابك.. وصرلي مدة،ي
ما كحلت بشوفتك عينيي
وعدتني.. تجي بالعيد
وتجيبلي.. هدية،ي
وأفرح بهالطلة البهية،ي

وأجا العيد... يابني
وجاني صوتك.. من بعيد
بعد المدى
مع نسمات الفجر جايي
ع الهدى
ينسم.. بمسمعي
و يتردد صدى
يما...أنا جايي...يما..أنا جايي
أرضي عليي

يما..قومي لاقيني ع الباب
وهللي... يما
جيتك أنا... محمول
ع كتاف رفاق الدرب
شهيد ومغسل... بدمه
لاقيني.. يما
ولا تبكي.. يما زغردي
وافتحي نعشي...وضميني
و ع جبيني يما... قبليني
وكلامك الحلو... سمعيني
واحمليني... يما
متل يوم كنت طفل صغير
بحضنك تضميه.. وتحمليه
وتهكلي... همه

يما..
حضري...الزفة
جيتك...أنا عريس
ودمو..........ع كفه
شهيد ومكفكف... بالعلم
وملفوف بالطهر... لفه
زفيني.. يما
جيتك... بيوم العيد
زفيني... بورود وزغاريد
بصوت الصبايا الجيد
وزغردي.. يما وهللي
أبنك رجع شهيد... هديتك بيوم العيد
أبنك رجع شهيد... هديتك بيوم العيد

ولا تنسي.. يما الهدية،ي
هالعلم طرحة... للبنية،ي
وجايبلا فستان أحمر
بتراب الوطن معطر.. مبخر
ومطرز.. بكل قطرة دم فيي
زفينا... يما
وافرحي فينا... أنا وهيي
وقليلها
ما خلف معك بالوعد... بنيي
عريسك رجع شهيد... هديتك بيوم العيد
أبني رجع شهيد... هديتك بيوم العيد
وهديتي... أنا هيي
وزغردي.. يما.. وارضي عليي
واقبلي... فيي الهدية

أحمد أحمد الرسام الصغير