شعر ياسر البشلاوى،،،،،بحبك بجد

بحبك بجد
بحبك وحبك شادد قلبى شد
بحبك تعالى ياضى الليالى
بعدك شعور فوق احتمالى
تعالى تعالى .
تعالى نكسر شعور التعالى
تعالى نشيد كام سد عالى
تعالى نشبك أيدينا فى أيدينا
ونحلم بنجمة تصحى عنينا
تصحى الشهيد اللى مدفون فى سينا .
بحبك فى سينا بحبك فى شالى
وحبك ده شوق أخضر سنابل
يحلى البحور يغطى الصحارى
وحبك ربيع مزهر مجالى

ربيعك فتنا  ووردك ده حنة
شفيفك مشاتل وعودك خمايل
وفى الأصل جنة
وحبك طيور تطير فى العلالى
تعالى تعالى .

نسهر ليالى فوق السفينة
نجوب البحار
عيونك منار
تنور طريقى
وانتى اللآلئ جوه المحار

تعالى نغنى كل الاغانى
حتى سكوتنا نخليه حوار
نترجم كلامنا لكل المعانى

تعالى وغطى برمشك جبينى
تعالى يابلدى يابلدى تعالى
انا كنت ساكت وقاعد فى حالى
مش انتى اللى ثرتى وغيرتى حالى
يا اما اجيلك يا اما تعالى
كفاية تعالى بحبك يامصر

شعر ياسر البشلاوى