مش من هناللفنان والشاعر المتالق احمد صبري

مش من هنا
احمد صبري
-
وقفوا الجميع يتفرجوا
وكاْنهم مش مننا
وكاْننا بنهرجوا
وهما اْغراب عننا
في دنيا تانية بقوا
مش عايشين عندنا
اوقات كمان يتريقوا
على جرحنا وهمنا
-
هنا مفيش اْحلام تعيش
وتلاقي روحها ونفسها
هنا الضعيف مابيساويش
وناس تموت من ياْسها
هنا السكات لازم يبات
حاضن ضلوع المجروحين
هنا الولاد زي البنات
كرهوا كلام العاشقين
-
مات الحنين عطشان
والدم سايل مطر
ورد الشباب دبلان
زي اْوراق الشجر
كفايا تضليل وغش
بكلام حلو و كداب
ماعادش في معلش
وكل لحظة خراب

-
ناموا العيون كلها
بمذلة تطرح دموع
وطيور على شكلها
تقع بزيف مصنوع
صدق حجا لما قال
بعيدة و ماليش فيها
طربقه ماشي شمال
كاْنه متوحي عليها
-
خرب وهنقول عمرها
الوهم يعمل معجزات
إكتب شهادة دمارها
وإحنا نقول إنجازات
وإللي خاين او مجنون
مش عاجبه لازم يعجبه
إحنا ليه بنبني السجون
مش برضه عشان يتاْدبه

ياللي مبسوط وراضي
ماتجيبش سيرة اْهلنا
إساْل طين الاْراضي
ياما إتروى من دمنا
كلنا بنحب الشهيد
والشهيد كان مننا
وإللي بينكر اْكيد
البعيد مش من هنا